Matika te pae, toro te pae, tū te pae, takoto te pae. 
He pae whenua, he pae moana, he pae tangata, 
He pae kaupapa, he pae kōrero, he pae rangakura.
Whāia te pae, e tau ki te pae, ka tika te pae 
ki a Uri, ki a Mokopuna. 

Kei te paewai o te rangi e āritarita mai ana te hanga nei, 
Te āheinga o Manako, te whakatinanatanga o Rangahau, 
Te whakahīkoitanga o Ara Hou, Matomatotanga; 
Tōnuitanga, Taurikuratanga, Pāhauteatanga, 
Whanaketanga i tōna ao i tōna wā. 
Hua atu. Hua mai. Hua ki te ake ake. 

Kei hea te papa o te pito mata? 
Kei te whakapono i te ngākau, Te whakakitenga a Kui, a Koro mā; a Onamata, a Anamata 
He kite i te hīnātoretanga o Ora i te nehenehetanga o Pōuriuri. 
He kite i te korenga i kitea, engari, he rongo kei konā. 
Kei a koe. Kei ahau. 
Tāua. Tātou. 

I a ha ha Kia rere te pātai, he aha rawa ia kei tua i ngā pae o te māramatanga? 
Me te whakautu anō, he whakaputa i ā tātou i ako ai hei whakaāhei i te kōrero 
“Ko au hei rangatira mōku, māku anō te rā e whiti ai ki tua”.

I a ha ha Kia rere te pātai, he aha rawa ia kei tua i ngā pae o te māramatanga? Me te whakautu anō, he whakaputa i ā tātou i ako ai hei whakaāhei i te kōrero  “Ko au hei rangatira mōku, māku anō te rā e whiti ai ki tua”.